Dŵr Cymru Welsh Water yw perchnogion Stad Elan ond mae’r rhan fwyaf ohoni wedi’i breinio yn Ymddiriedolaeth Cwm Elan ar brydles 999 mlynedd. Mae darparu cyflenwad dŵr glân yn un o brif swyddogaethau’r Stad – ac felly mae’r ardal gyfan yn cael ei rheoli mewn ffordd eco-gyfeillgar er mwyn diogelu ansawdd y dŵr. Mae hynny, yn ei dro, yn golygu bod cyfoeth o fywyd gwyllt amrywiol yn y cwm. Yn wir, mae’r ardal gyfan yn rhan o Ardal Amgylcheddol Sensitif (AAS) Mynyddoedd Cambria; mae’n Ardal Gwarchodaeth Arbennig (AGA) ar gyfer adar gwyllt; ceir ynddi Ardaloedd Cadwraeth Arbennig (ACA) ar gyfer cynefinoedd; ac mae’r rhan fwyaf o’r tir wedi’i ddynodi’n Safleoedd o Ddiddordeb Gwyddonol Arbennig (SoDdGA).

Rydym yn gwerthfawrogi arwyddocâd y dynodiadau hyn ac yn cynnal rheolaeth ymarferol ar gynefinoedd yn rheolaidd, cadwraeth yn ogystal â gweithio i wella hygyrchedd.

Rydym yn gweithio’n galed i warchod creaduriaid a phlanhigion Stad Elan, i annog y cyhoedd i ymweld, i hybu addysg amgylcheddol ac i warchod y Stad rhag datblygiadau anaddas.

Ymddiriedolaeth Cwm Elan sy’n gyfrifol am weinyddu’r rhan fwyaf o’r Stad 72 milltir sgwâr fel Landlord i 28 o ffermydd a 38 o dai, a ffermio 9 bloc o dir ‘mewn llaw'(sef cyfanswm o dros 7,000 erw) a gofalu am gyfleusterau ar gyfer y cyhoedd, bythynnod gwyliau a chynnal a chadw’r stad yng Nghwm Elan a Dyffryn Claerwen.

Mae hon yn ardal o harddwch naturiol ond bu gan ddyn law yn ei ffurfio hefyd. Mae’n ardal i’w mwynhau a’i diogelu gan bawb ohonom. Fel gwarchodwyr Cwm Elan, edrychwn ymlaen at eich croesawu a hoffem glywed eich ymateb, eich barn a’ch pryderon.